بھارت کے لیجنڈری اداکار 62 برس کی عمر میں چل بسے

ملیالم فلم انڈسٹری کے معروف اداکار اور پروڈکشن کنٹرولر کنن پٹانبی 62 سال کی عمر میں انتقال کر گئے۔ وہ کوزھی کوڈ کے ایک نجی اسپتال میں گردے کی بیماری کے علاج کے دوران وفات پا گئے۔

ان کی وفات کی تصدیق ان کے بھائی، فلمساز اور اداکار میجر روی نے کی۔ میجر روی نے سوشل میڈیا پر ایک پوسٹ کے ذریعے یہ خبر شیئر کی۔ پوسٹ میں انہوں نے لکھا کہ "میرا عزیز بھائی کنن پٹانبی گزشتہ شب 11:41 بجے انتقال کر گئے۔ آج 4 بجے ان کی آخری رسومات ادا کی جائیں گی۔”

کنن پٹانبی کئی سالوں تک ملیالم فلم انڈسٹری سے وابستہ رہے۔ انہوں نے پروڈکشن کنٹرولر کے طور پر کام کیا اور فلموں میں سپورٹنگ رولز بھی ادا کیے۔

انہوں نے مشہور اداکار موہن لال کی کئی فلموں میں بھی کام کیا۔ ان میں ’پولیموروگان‘ شامل ہے، جو بعد میں بڑی کامیابی حاصل کرنے والی فلم بنی۔ دیگر اہم پروجیکٹس میں ’12تھ مین‘، ’کرام یودھا‘، ’کورکشیترا‘، ’بلیک‘ اور ’ویٹم‘ شامل ہیں۔