پی ٹی اے نے ہیک ہونے والے واٹس ایپ اکاؤنٹ کو واپس حاصل کرنے کا آسان طریقہ بتا دیا

پاکستان ٹیلی کمیونیکیشن اتھارٹی (پی ٹی اے) نے ہیک ہونے والے واٹس ایپ اکاؤنٹس سے متعلق صارفین کے لیے اہم رہنمائی جاری کر دی ہے۔

واٹس ایپ اس وقت پاکستان میں سب سے زیادہ استعمال ہونے والی میسجنگ ایپ ہے، اسی وجہ سے ہیکرز بھی اکثر صارفین کو نشانہ بناتے ہیں۔ اکاؤنٹ ہیک ہونے کی صورت میں صارفین کو فوری طور پر پریشانی کا سامنا کرنا پڑتا ہے، تاہم پی ٹی اے کے مطابق چند آسان اقدامات سے یہ مسئلہ حل کیا جا سکتا ہے۔

پی ٹی اے نے اپنے سوشل میڈیا پیغام میں بتایا کہ اگر کسی صارف کا واٹس ایپ اکاؤنٹ ہیک ہو جائے تو سب سے پہلے واٹس ایپ کو دوبارہ انسٹال کریں۔ اس کے بعد اپنا موبائل نمبر درج کریں۔ واٹس ایپ کی جانب سے ایک تصدیقی کوڈ موصول ہوگا۔ کوڈ درج کرتے ہی اکاؤنٹ دوبارہ صارف کے کنٹرول میں آ جائے گا۔ یہ عمل ہیکر کی رسائی کو فوری طور پر ختم کر دیتا ہے۔

اتھارٹی کا کہنا ہے کہ اکاؤنٹ واپس حاصل کرنے کے بعد سیکیورٹی کو مزید مضبوط بنانا بے حد ضروری ہے۔ صارفین کو چاہیے کہ فوراً ٹو اسٹیپ ویری فکیشن کو فعال کریں۔ اس فیچر کے ذریعے اضافی پن کوڈ لگ جاتا ہے، جس سے اکاؤنٹ کو دوبارہ ہیک کرنا مشکل ہو جاتا ہے۔ اس کے ساتھ ساتھ موبائل فون اور واٹس ایپ کے پاس ورڈ بھی تبدیل کرنے کی ہدایت کی گئی ہے۔

پی ٹی اے نے صارفین کو مشکوک لنکس، غیر معروف فائلز اور اجنبی پیغامات سے دور رہنے کا بھی مشورہ دیا ہے۔ اگر اکاؤنٹ ہیک ہونے کے دوران کسی دوست یا فیملی ممبر کو غیر معمولی پیغامات گئے ہوں تو انہیں فوراً آگاہ کریں تاکہ مزید نقصان سے بچا جا سکے۔ اس کے علاوہ موبائل فون میں اینٹی وائرس اسکین چلانے کی بھی سفارش کی گئی ہے۔

پی ٹی اے کے مطابق محتاط رویہ اور سادہ حفاظتی اقدامات اپنا کر نہ صرف ہیک ہونے والے واٹس ایپ اکاؤنٹ کو واپس حاصل کیا جا سکتا ہے بلکہ آئندہ ایسے واقعات سے بھی بچاؤ ممکن ہے۔