ماہانہ کتنا الاؤنس ملے گا؟ ملازمین کیلئے بڑی خوشخبری آگئی

پشاور الیکٹرک سپلائی کمپنی (پیسکو) کے بورڈ نے گرڈ اسٹیشنز پر کام کرنے والے ملازمین کے لیے اہم مالی سہولت کی منظوری دے دی ہے۔

 اس فیصلے کے تحت گرڈ اسٹاف کو ماہانہ 7 ہزار روپے ڈینجر الاؤنس دیا جائے گا، جس کا اطلاق فوری طور پر ہو گیا ہے۔ اس اقدام کو فیلڈ میں کام کرنے والے عملے کے لیے بڑی پیش رفت قرار دیا جا رہا ہے۔

پیسکو کے جاری کردہ اعلامیے کے مطابق یہ الاؤنس ایسے ملازمین کے لیے مختص ہے جو روزانہ خطرناک حالات میں اپنی ڈیوٹیاں انجام دیتے ہیں۔ ان میں ایس ایس او، فٹرز، ٹیسٹ انسپکٹرز اور ہیلپرز شامل ہیں۔ بورڈ اجلاس میں اس معاملے پر غور کے بعد متفقہ طور پر الاؤنس کی منظوری دی گئی۔

ادارے کا کہنا ہے کہ گرڈ اسٹیشنز پر کام کے دوران ملازمین کو بجلی سے جڑے شدید خطرات کا سامنا رہتا ہے۔ ڈینجر الاؤنس کا مقصد ان ملازمین کی حوصلہ افزائی کرنا اور انہیں اضافی مالی تحفظ فراہم کرنا ہے تاکہ وہ زیادہ اعتماد کے ساتھ اپنی ذمہ داریاں نبھا سکیں۔

پیسکو حکام کے مطابق یہ الاؤنس گرڈ اسٹیشنز پر تعینات تمام اہل ملازمین کو دیا جائے گا۔ اس فیصلے سے نہ صرف عملے کے مسائل میں کمی آئے گی بلکہ ادارے کے اندر افرادی قوت کے حوصلے میں بھی اضافہ ہوگا۔