محکمہ موسمیات نے کراچی والوں کیلئے خطرے کی گھنٹی بجادی

کراچی میں سردی کی شدت میں مزید اضافہ متوقع ہے، ماہرین نے اس حوالے سے خبردار کیا ہے کہ آئندہ دنوں میں سردی کی شدت برقرار رہ سکتی ہے۔

محکمہ موسمیات کے مطابق سندھ کے دیہی علاقوں سمیت کراچی میں سردی کی لہر جاری ہے اور شہر میں کم سے کم درجہ حرارت مسلسل دوسرے روز یک رقمی اعداد میں ریکارڈ کیا گیا ہے۔ محکمہ موسمیات کے مطابق اتوار کو کم سے کم درجہ حرارت 8 ڈگری سینٹی گریڈ تک گرنے کا امکان ہے۔

چیف موسمیات کراچی عامر حیدر لغاری کا کہنا ہے کہ موجودہ سرد لہر منگل تک جاری رہ سکتی ہے۔ ان کے مطابق حالیہ مغربی بارش کے نظام کی وجہ سے سردی میں اضافہ ہوا ہے، کیونکہ اس کے اثرات کے بعد قدرتی عمل کے تحت سرد ہوائیں شہر میں داخل ہوتی ہیں۔

عامر حیدر لغاری نے بتایا کہ جب یہ مغربی نظام مکمل طور پر نکل جائے گا تو سائبیرین ہوائیں فعال ہو جائیں گی، جس کی وجہ سے درجہ حرارت میں مزید کمی محسوس ہوگی۔ انہوں نے کہا کہ اگلے 10 دنوں کے دوران کراچی میں کسی بارش کے نظام کے اثرات متوقع نہیں ہیں۔